LAOAG CITY – Umaboten iti sumurok 100 ti natay ken sumurok 390 ti mapagat-atapan nga addaan ti kaso ti Ebola idiay Democratic Republic of Congo (DRC) basar iti Africa Centres for Disease Control and Prevention.
Nairekord metten ti virus idiay Uganda nga adda ti dua a kumpirmado a kaso ken maysa ti pimmusay.
Karaman kadagiti kumpirmado a naakaran ti maysa nga Amerikano a doktor iti Democratic Republic of Congo a dumalan idiay Germany para iti pannakaagasna.
Adda ti sumagmamano nga Amerikano ti posible a na-expose iti virus nga agdama a tultulungan ti gobierno ti Estados Unidos.
Immunan nga indeklarar ti World Health Organization (WHO) ti outbreak kas public health emergency of international concern ngem adayo nga agbalin a pandemia.
Nupay kasta, naiballaag ti naiget a panangsurot kadagiti pagannurotan aglalo iti panangitabon dagiti natay gapu iti nangato a risgo nga agwaras ti virus.
Nangipatungpal metten ti border screening dagiti kaparanget a pagilian kas iti Rwanda ken Nigeria kas addang iti panangliklik ti virus.
Basar iti United States Centers for Disease Control and Prevention (CDC), nababa ti peggad daytoy iti Amerika ngem imon-monitor-da dagiti biahero manipud kadagiti naapektaran a lugar a sumangsangpet idiay Estados Unidos.
