LAOAG CITY – Inpakaammo ni Mr. Theody Pascua, residente ti Barangay Bugasi iti ili ti Banna ken uliteg ni Mr. Ricky Jay Pascua a maysa a Person With Disability wenno adda ti rangkap ti bagina a nakabkabil iti Barangay Naguillan iti ili ti Nueva Era a tinagbat ken tinutukan ti paltog ti lima nga indibidual ti kaanakanna nga umel.
Segun kenkuana, napan iti ili ti Nueva Era ti kaanakanna tapno mapan makigapas ken kabayatan a magmagna daytoy nga agawid iti pagtaenganda ket adda ti nakamotorsiklo a kellaat a nangtulpak ken nangtutuk ti paltog iti kaanakanna.
Inbatadna a kalpasan ti dua nga aldaw ket nagsubli ti kaanakanna tapno mapan agibuyon ken nagiinumda ket ditoy a nalasinna dagiti nangdangran kenkuana a nangitunda ti panagririri dagitoy.
Inlawlawagna a nagsagaba ti nakana a sugat ti kaanakanna iti nagduduma a paset ti bagina gapu iti panangpang-or pay kenkuana.
Kunana nga uppat nga aldaw a nai-confine ti kaanakanna ken kinasapulanna pay a masalinan ti dara.
Mainaig iti daytoy, desidido a mangipila ti pamilia ti biktima kontra kadagiti suspek gapu iti napasamak nga insidente.
Kabayatanna, bayat a maisursurat daytoy a damag ket nagturongen dagiti otoridad iti pagtaenganda para iti panangiwayat iti naun-uneg nga imbestigasion.
