LAOAG CITY – Nasakit ti nakem ti retirado a pulis a ni Mr. Joy Vergara iti Brgy. 19, Napu iti ili ti Badoc gapu ti naisayangkat a search operation iti balay da iti live-in partner na a ni Nita Rondal babaen kadagiti kameng ti Provincial Drug Enforcement Unit.
Bayat iti panagsukimat dagiti otoridad iti pagtaengan dagiti subject, nakumpiskarda dagiti tallo a sachet a naglaon ti maatap a shabu ken maysa a granada iti cabinet iti kuarto dagiti ag-live in partner.
Basar kadagiti otoridad, nakitada dagiti iligal a droga iti mismo bag ti live-in partner ti retirado a pulis nga agbalor ti nasurok-kumurang 100 a ribu a pisos.
Malaksid iti daytoy, adda pay ti nakitada a sachet a pagianan ti mapapati a shabu.
Inpetteng ni Vergara nga awan ti ammo na kadagiti naala nga ebidensya iti pagtaengan da iti live-in partner na ken tinalaw da daytoy a nakawakwak rason a saanna a masinunuo no adda dagiti napan simrek bayat nga awan da.
Inpaganetget na a saan pay a nakakita ken nakaraman ti shabu, ken saanna pulos a maaramid ti agikot ti granada gapu ta agamak amangan no isumet laeng ti pakatayan na.
Innayon na nga uray patayen da ket saanna pulos nga admitiren a bagina dagiti naala nga ebidensya iti uneg ti balay da iti live-in partner na.
Kuna na pay nga uray pagdamagan pay dagiti opisyal iti barangay no adda ti madmadlaw da maipanggep iti maipagarop nga illegal nga aktibidad na.
Mainaig iti daytoy, inadmitir na a simmuko idi iti nailian a pulisya kalpasan a kinasarita ti mayor iti nasao nga ili a maipagarop a mairamraman ti nagan na a maipagarop a drug protector.
Inkalintegan na nga inaramid na laeng ti simmuko tapno madalusan ti nagan na ken saanna a kayat ti matay kangrunaan na ket ammo na nga awan ti ar-aramiden na a dakes.
Nadakamat pay a bayat ti panagsukimat dagiti otoridad iti pagtaengan ti retirado a pulis ket awan ti live-in partner daytoy.
Kabayatanna, nasdaaw ni Barangay Chairman Rogelio Rondal iti naisayangkat nga operasyon iti balay ti retirado a pulis kangrunaan na ket maibilang ti barangay da kas drug free barangay.
Kuna na a ti laeng ammo na ket ti live-in partner ni Vergara ti simmuko iti kallabes.
Inpanakkel na pay nga amin a drug surrenderees iti barangay da ket nagturpos da amin iti Community-Based Rehabilitation Program (CBRP).
Innayon na a no aniaman ti maipabpabasol ken ni Vergara ken ti live-in partner na iti agdama ket sungbatan da laengen iti husgado.
