LAOAG CITY – Winaya-wayaan ti Community Environment and Natural Resources Office iti ili ti Bangui dagiti tallo a dumptruck ken maysa a backhoe a kukua ni Mr. Larry Sunga, maysa a proprietor, nga immunan nga inpakustudyar iti nasao nga opisina.
Segun kenni Forester Mark Rowell Juan, focal person iti CENRO Bangui, rinentaan ti lokal a gobyerno iti nasao nga ili dagiti heavy equipment a mausar para ti maysa a proyekto da iti sanitary landfill.
Kuna na nga awan ti nakaserrek iti quarry site a kukua ni Joey Soriano.
Innayon na nga adda met laeng iti permit dagiti maseknan nga inpakita iti CENRO.
Maipalagip a nagreklamo ni Soriano iti CENRO gapu ti maipagarup nga iseserrek dagiti nasao a dadakkel a lugan tapno agquarry.
