LAOAG CITY – Inrakurak ni President Delcy Rodriguez nga umaboten iti 32 ti natay ken agarup 700 ti nasugatan kalpasan ti magnitude 7.1 a gingined idiay Venezuela.
Basar iti United States Geological Survey, mapatta-patta nga adda ti 44% ti tsansana nga adda ti sumurok 10 a ribu ti natay ken 30% met ti tsansana nga adda ti sumurok 100 a ribu.
Naiget ti maiwaywayat a search and rescue operation iti lugar no sadinno nga adda dagiti mangmangngeg nga agkidkiddaw ti tulong.
Awan ti kuryente dagiti pasdek ken naminpinsan a nagserra ti metro system.
Arig nagsala dagiti dadakkel a pasdek iti paset ti Caracas.
Narikna pay ti panagdayyeg ti gingined idiay Colombia.
Ti magnitude 7.1 a gingined ket timmama iti paset ti Montalbán nga adda ti kauneg a 13.2 a kilometro.
Gapu iti daytoy, insigida a nagibakwit dagiti residente iti lugar no sadinno nga adda ti sumagmamano nga apartment ti nagrikki ken nabuong dagiti tawa dagitoy.
Naammoan a manarimaan ti panangselebrar ti Venezuela ti national holiday ken kaadoan kadakuada ket adda kadagiti pagtaenganda idi napasamak ti napigsa a gingined.
Kabayatanna, nangiyisyu ti United States Tsunami Warning System ti tsunami alert iti Venezuela, Aruba ken Bonair pakairamanan iti Puerto Rico ken ti British Virgin Islands.
