LAOAG CITY – Agtultuloy pay laeng ti imbestigasyon ti Bureau of Fire Protection no anya ti namunganayan ti uram iti Solsona-Apayao Road ken iti paset ti Padsan River.
Daytoy ti inbatad ni Fire Chief Inspector Claire Simbol, Acting Fire Marshal iti Bureau of Fire Protection (BFP) ditoy Ilocos Norte.
Segun kenni Simbol, adda pay laeng ti asok iti kabanbantayan a paset ti Solsona-Apayao Road rason nga agtultuloy ti panangsebseb ken panang-monitor da iti lugar.
Inbatad na nga idi kalman ket adda pay ti nagresponde nga helicopter ngem naminsan laeng ti panangibuyat na ti danom gapo ta marigatan daytoy gapo iti kapigsa ti angin ken kadakkel ti apoy.
Kunana nga iti agdama ket awan pay ti masinunuo a rason iti napasamak a dakkel nga uram.
Kabayatanna, iti met ili ti Sarrat ket nakontrol ti uram idi pay laeng kalman ken maim-imbestigar pay laeng no anya ti met namunganayan ti uram. Adda dagiti rumumuar nga impormasyon a posible nga adda ti napan nagpuor iti kabantayan ken iti igid ti Padsan River ken mabalin a nabaybay-an dagitoy.
