LAOAG CITY – Simmuko ti uppat a lallaki ditoy probinsya a nawayawayan gapu iti Good Conduct Time Allowance Law.
Nabigbig dagitoy a da ni Artemio Medina y Martinez, 63, naasawaan, residente ti Brgy. Abaca iti ili a Bangui; Roly Tabieros y Malda, 53, naasawaan, residente ti Brgy. Saud iti ili a Pagudpud, ken dagiti agama iti ili ti Sarrat a da Samuel Baoit ken ti anak na a ni Brendi Baoit, agpada a nakunbiktaran ti kaso a murder.
Ni Medina ket nabalud idi 2006 gapu iti kaso a panaglabsing ti RA 9165 wenno Comprehensive Dangerous Drugs Act of 2002 ngem nawaya-wayaan idi 2017 kalpasan ti 11 a tawen.
Kabayatanna, nabalod met ni Tabieros gapu iti 2 counts ti kaso nga Homicide idi Abril 23, 2009 ngem nawaya-wayaan idi Hunyo 13 ita a tawen idinto a nawaya-wayaan ni Samuel idi Hunyo 2017 ken ni Brandi ket idi Mayo 2018.
Kinumpirmaran ni Pol. Col. Cesar Pasiwen ti Provincial Director ti Ilocos Norte Police Provincial Office a manamnama a maibyahe dagiti uppat iti BuCor iti umay a lawas.
Maipalagip a nangted ti ultimatum ni Presidente Rodrigo Duterte kadagiti 2,000 GCTA beneficiaries a sumuko kadagiti otoridad tapno dumalan ti re-evaluation ken re-computation.
