LAOAG CITY – Nagballaag manen ni United States President Donald Trump iti Iran kalpasan nga inrakurakna a masapul nga insigida nga agtignay ti Tehran para iti peace deal no saanda a kayat ti nakarkaro a situasion.
Inbatad ni Trump nga alisto ti panaglikos ti oras para iti Iran kabayatan nga agtultuloy ti gubat a nangrugi kalpasan a nangiwayat ti nalawa a panangatake ti Estados Unidos ken Israel kontra iti Iran idi Pebrero 28.
Agtultuloy a marigrigatan ti dua a partido maipapan iti peace negotiations kabayatan a kumarkaro ti epekto ti rinnupak iti Middle East no sadinno nga apektado ti world price ti langis.
Kagiddan daytoy, inrakurak ti Israeli military a nagpaputok manen ti sumurok-kumurang 200 projectile ti grupo nga Hezbollah kontra iti Israel iti baet nga adda ti maipatpatungpal a ceasefire extension iti nagbaetan ti Israel ken Lebanon.
Kabayatanna, kuna ti Lebanon health ministry a lima nga indibidual pakairaman ti dua nga ubbing ti natay iti baro nga airstrikes ti Israel iti southern Lebanon.
