LAOAG CITY – Inlawlawag ni Bombo International News Correspondent Rene Ballenas manipud idiay Estados Unidos seknan iti unconditional discharged a sangsangoen ni United States President-elect Donald Trump.
Segun kenkuana, awan ti multana ken saan a maibalod ngem nakairekord isuna kas convicted felon.
Inbatadna a sakbay pay daytoy ket adda ti immunan a kaso a sinango ni Trump a namulta daytoy iti agarup lima a milyon a dolyar gapu iti defamation.
Kunana a napintas ti justice system idiay Estados Unidos gapu ta awan ti kimmontra iti pannakakombiktar ni Trump.
Mainaig iti daytoy, inpakaammo ni Ballenas a saanen a kasapulan pay a gumatang ni Trump ti adu a paltog gapu ta naruayen dagiti security personnel a nakapalikawkaw kenkuana.
Inpettengna a maibilang latta a convicted felon ni Trump iti baet ti panagtugawna kas Presidente ti Estados Unidos.
Innayonna a kadagupan kadagiti 47 a nagbalin a Presidente ti Estados Unidos ket ni Trump laeng ti maibilang a convicted felon.
