LAOAG CITY – Saan a madanagan ni United States Vice President Kamala Harris iti umuna a face-to-face debate-da ken ni dati nga United States President Donald Trump para iti United States Election.
Sumagmamano kadagiti inaramid a panagsagsagana ni Harris ket kasaritana da United States President Joe Biden ken dati a First Lady Hillary Clinton a nakasangoda ni Trump kadagiti naglabas nga eleksion.
Agbuya iti kampo ni Harris dagiti sumagmamano a Democratic governors a pakairamanan da Govs. Josh Shapiro ti Pennsylvania, Roy Cooper ti North Carolina, Michelle Lujan Grisham ti New Mexico ken Gavin Newsom ti California.
Agbalin a makumikom met ni United States President Biden gapu iti pannakaiyuswat ti debate da Harris ken Trump.
Bumisita iti White House dagiti nagkampeon ti NCAA basketball teams nga University of South Carolina ken University of Connecticuts men’s team.
Iti malem ket agturong ni Biden iti New York para iti pananglagip ti September 11 terror attacks.
Inbatad ni White House press secretary Karine Jean-Pierre a mabalin nga iti Manhattan hotel laengen nga agbuya ti debate ti United States President.
Naammoan a kalpasan ti debate ket kaduaen isuna ni Harris tapno bisitaen dagiti lugar a nakapasamakan ti September 11 attacks iti New York, Shanksville, Pennsylvania ken Pentagon.
Maisayangkat ti National Constitution Center iti Philadelphia ti kaunaan a debate da Trump ken Harris.
Iti biang met ni Trump ket saanna nga inkagumaan ti panagsukisok gapu ta nagbalin a beterano daytoyen iti nasao a debate no sadinno sumagmamano nga isyu a mabalin nga ibato daytoy ken ni Harris ket ti panangsuporta ti Estados Unidos iti gubat iti Gaza ken ti ekonomia.
