LAOAG CITY – Nagdinnungpar ti maysa a van ken pick-up iti Brgy. 22, San Cristobal iti ili ti Sarrat.
Basar iti Sarrat Municipal Police Station, nabigbig ti driver ti van nga Starex nga agmaris ti gray a ni Eduardo Hernando y De la Cruz, agtawen iti 49, naasawaan, foreman, residente ti Brgy. 48-B, Cabungaan ditoy siudad ti Laoag ken adda ti tallo a kakaduana a nakalugan.
Nabigbig met ti nangiturong ti pick-up a Raptor nga agmaris ti puraw a ni Fede Max Aquino y Tolentino, agtawen iti 54, awanan asawa, retirado nga Overseas Filipino Worker ken adda ti maysa a kaduana a nakalugan nga agpada a residente ti Brgy. Anao iti ili ti Piddig.
Maibasar iti imbestigasion, kabayatan a dumaldalyasat ti pick-up nga agturong nga agpa-daya ket kellaat nga immagaw ti linya ti sumungsungad a van a nangitunda ti panagdinnungparda.
Gapu iti daytoy, nagsagaba ti nakana a sugat ti driver ti van pakairamanan dagiti tallo a kakaduana iti nagduduma a paset ti bagida idinto a nagsagaba met ti minor injuries dagiti nakalugan iti pick-up nga agpapada dagitoy a naitaray iti Gov. Roque B. Ablan Sr. Memorial Hospital para iti naan-anay a pannakatamingda.
Naammoan a pimmusay ti maysa kadagiti nakalugan iti van a nabigbig a ni Remus Alonzo y Tomas, agtawen iti 54, naasawaan, construction worker ken residente ti Brgy. 43, Cavit ditoy siudad ti Laoag.
Kabayatanna, agtultuloy pay laeng ti maiwaywayat nga imbestigasion dagiti otoridad maipapan iti napasamak a desgrasia.
