LAOAG CITY – Saan nga umannugot ni Senate Minority Leader Aquilino “Koko” Pimentel III iti gakat a gagem a mangipatungpal ti refund mechanism para iti Value Added Tax (VAT) kadagiti gangganaet a turista no sadinno a saan a mabenepisiaran dagiti Pilipino.
Daytoy ket kageddan ti panangaprobar ti Senado iti maikadua a pannakaibasana ti Senate Bill 2415 a manggutgutigot ti refund iti Value Added Tax dagiti produkto a ginatang dagiti gangganaet nga addaan ti transaction value a dumanon iti P3,000 wenno nasursurok pay.
Inbatadna a ti nasao a gatad ket umdasen tapno mangipatakder ti 1,600 a baro a klasrum wenno 138 agingga 190 a kilometro ti sementado a kalsada.
Makasuporta payen ti P4 a bilyon kadagiti 400 a ribu a college students wenno 800 a ribu nga elementary wenno high school students iti babaen ti Assistance to Individuals in Crisis Situation social aid program ti gobierno.
