LAOAG CITY – Nakumpiskar dagiti lako ti maysa a vegetable vendor kalpasan a naglako iti maipawil a puesto iti paset ti Bonifacio Street ditoy siudad ti Laoag.
Segun iti vegetable vendor a ni Mrs. Euvilda Guillermo, kabayatan a matmaturog daytoy iti igid ti kalsada ket kellaat lattan a binagkatda dagiti nagduduma a klase ti nateng a lakona kas ti karabasa, parya, tarong, kamatis, utong ken dadduma pay.
Inbatadna a nakasupot pay laeng dagiti lakona ken saan pay a nakaiyaplag kadayta a gundaway.
Inlawlawagna a saan daytoy a nabartek idi kumpiskarenda dagiti lakona.
Kunana nga immutang pay isuna ti 10 ribu a pisos tapno igatang kadagiti lakona a natnateng.
Innayonna a malaksid kenkuana ket adda pay ti maysa a vegetable vendor ti nakumpiskar met dagiti lakona.
Mainaig iti daytoy, inpetteng ni Barangay Chairwoman Jocelyn Samonte a nakumpiskar dagiti lako ti nasao a vegetable vendor kalpasan nga aglaklako dagitoy iti saan a naikeddeng a lugar.
Inpakaammona nga adda ti maipatpatungpal nga ordinansa a naputar pay sipud idi 2019 a mangibagbaga a naiget a maipawil ti aglako kadagiti sidewalks, alley ken kalsada.
Inbatadna nga amin a nakumpiskar a lako kadagiti maseknan a vegetable vendors ket naikabil iti Civil Security Unit.
Inlawlawagna a nasken nga agbayad ti 300 a pisos kas multa dagiti vegetable vendors tapno maisubli kadakuada dagiti lakoda.
Naammoan a nangrugi a naglako ni Mrs. Guillermo kadagiti natnateng idi agtawen pay laeng daytoy ti 19 ngem ita laeng a napatawan ti pannusa gapu iti panaglabsingna iti pagannurotan.
Kabayatanna, naammiris ni Mrs. Guillermo a naglabsing isuna iti pagalagadan ken inpasingkedna nga agbayad daytoy iti naipataw a multa kenkuana.
