LAOAG CITY – Inpetteng ni Vice Mayor Maja Sales iti ili ti Pagudpud nga awan ti tensyon iti nagbaetan da kenni Mayor Rafael Benemerito kabayatan ti Sarungkar ti Barangay Program ti lokal a gobierno.
Segun kenni Sales, mapaneknekan dagiti kapitan a nagatendar ken dagiti pulis nga awan ti panagsinnubang da iti Mayor seknan iti local SAP.
Linawlawagan na pay a saan da a basta nagturong wenno simmurot iti Programa gapo ta adda ti naited kadakuada nga schedule.
Inbaga na pay nga uray trabaho daytoy ti mayor ket awan met ti nakailanad iti linteg a saan a mabalin a sumurot ti bise mayor ken konseho.
Kunana nga inlawlawag na laeng kenni Benemerito a saan a pudno a nabayag nga adda iti poder ti Sang. Bayan ti LGU-SAP ken ammo pay daytoy dagiti kakapitan gapo ta idi Hunyo 1 ket naaprubaran daytoy ken Hunyo 5 idi inpaima da iti opisina ti Mayor para iti aksyon na.
Nupay kasta, kuna ni Sales a manipud Hunyo 5 agingga iti Hunyo 16 ket arig na naturog ti dokumento mainaig iti LGU-SAP ken saan pulos a nagaraw wenno awan ti aksyon ti mayor.
Inbatad na a mabalin a ti kinagura ti mayor ket ti rakurak na kadagiti tattao a saan pulos a nagaraw ti LGU-SAP, ken adda ti rekord na kadagiti amin a dokumento.
Mainaig iti daytoy, naibaga ni Benemerito nga adda ti plano na a kasoan ti Sang. Bayan ken simmungbat ni Sales a no mangipila ti kaso ket saan nan nga irakurak kadagiti tattao gapo ta nasaysayaat no ipila na tapno masungbatan da.
Kabayatanna, kuna ti bise mayor nga awan iti lugar ti asawa na a ni dati a mayor Teteng Sales idinto a ni dati a mayor Marlon Sales ket adda ti kasapulan na iti asawa na mainaig kadagiti dokumento.
Innayon na a ti panagkiddaw na iti RMG ket para iti pagsayaataan na ket para iti police visibility.
