LAOAG CITY – Inpasigurado ni Vice President Sara Duterte nga agsungbat daytoy kadagiti summons nga inyisyu kontra kenkuana ti Senate Impeachment Court.
Segun kenkuana, iti agdama ket agsagsaganan ti defense team-na ti agbalin a sungbatda iti nasao a summons.
Maipalagip nga idi Hunio 11, inserbin ti Senate Impeachment Court ti nasao a writ of summons iti Office of the Vice President (OVP) idiay Mandaluyong City.
Kinumpirmaran ti Office of the Vice President a naawatdan ti summons.
Maiyallubog iti summons, maikkan laeng ti Bise Presidente ti non-extendible a 10 nga aldaw manipud iti petsa a naawatna daytoy tapno agsungbat.
Inbilin ti impeachment court a sumango daytoy iti Session Hall ti Senado iti oras ken aldaw nga inkeddeng ti Presiding Officer a ni Senate President Francis Escudero.
