LAOAG CITY – Idauloan ni Vice President Sara Duterte ti panaguummong dagiti Pilipino idiay The Hague, Netherlands ita a Mayo 31 kagiddan ti maika-47 a panagkasangayna ita nga aldaw.
Gagem ti panaguummong ket tapno gutiguten ti International Criminal Court a waya-wayaan ti pannakaibalud ni dati a Presidente Rodrigo Duterte.
Ti nasao a panaguummong ket inorganisar ti Filipino communities idiay Europa a dimmayo pay dagiti sumagmamano a Pilipino nga aggapu iti dadduma a paset ti Europa tapno agatendar iti nasao a panaguummong.
Kadua ti Bise Presidente ti ina daytoy a ni Elizabeth Zimmerman a binisitada ti dati a Presidente iti pagbaludanna.
Maipalagip nga inarestar ti International Criminal Court ti dati a Presidente idi Marso 11 gapu iti nadara a kampania daytoy kontra iti iligal a droga.
