LAOAG CITY – Inkiddaw ni Vice Mayor Rey Carlos Fariñas ken ni Mayor James Bryan Alcid a no mabalin ket saanen a kasapulan pay ti surat tapno agkiddaw ti pannakabulod ti ambulansia ken siphoning wenno dadduma pay a serbisio ditoy siudad ti Laoag.
Segun ken ni Fariñas, adda ti Tax Ordinance-na amin dagitoyen isut gapuna a saan koman a kastoy ti maaramid tapno saan a maibayagan dagiti maseknan iti panagbulodda.
Inbatadna a no adda laketdi dagitoy a services wenno available ket kasapulan laengen ti panagbayadda iti treasury office tapno al-alistoda a mabulod.
Inlawlawagna nga isu pay a trabaho ti Mayor a mangaprobar kadagitoy a banag isut gapuna a no mabalin ket maiplastar ti pannakaiproseso ti panagbulod dagitoy.
Innayonna a daytoy a ganuat ket tapno saan a maibayagan dagiti maseknan aglalo no kasapulanda unay dagitoyen kangrunaanna ti ambulansia.
