LAOAG CITY – Pabor ni Vice Mayor Rey Carlos Fariñas ditoy siudad ti Laoag ti nagbalin a rakurak ni Gov. Matthew Marcos Manotoc nga awanton ti masingir nga entrance fee wenno environmental fee iti panagserrek ti Ferdinand Edralin Marcos Stadium.
Segun kenkuana, dakkel daytoy a banag a pakalag-anan dagiti estudiante nga agkalikagum a sumrek iti Marcos Stadium.
Inbatadna a napinpintas pay a makita nga agturong dagiti estudiante iti Marcos Stadium apaman a malpas ti klaseda nga imbes nga agtambayda iti sabali a lugar.
Inlawlawagna a kasapulanda pay laeng nga obserbaren ti pormal a pannakaipatungpal ti baro a pagannurotan nangruna dagiti maikeddeng nga iskedyul a sumrek iti Marcos Stadium.
Maipalagip a nangipasa ti Sangguniang Panlungsod ditoy siudad ti Laoag ti maysa a resolusion a mangkidkiddaw ti libre a panagserrek dagiti ubbing wenno estudiante iti Marcos Stadium.
