LAOAG CITY – Nangipila ni Vice President Sara Duterte ti petision iti Korte Suprema tapno maibasura ti tallo a kaso a grave threat nga inpila ti Department of Justice (DOJ) kontra kenkuana.
Iti Petition for Certiorari and Prohibition a napakuyogan iti aplikasion para iti Temporary Restraining Order (TRO), kiniddaw ti bise presidente ti pannakawaswas ti resolusion ti DOJ a nangirekomendar a maipila ti kaso kontra kenkuana.
Kiniddaw pay ni Duterte ti pannakawaswas ti resolusion ti Quezon City Regional Trial Court a nangibasura iti motion to quash kasta met ti warrant of arrest a naipaulog kenkuana.
Karaman pay iti petisionna iti Korte Suprema ti pannakawaswas ken pannakalapped ti prosekusion ken ti korte ti Quezon City iti aniaman nga aksyon a mainaig iti kaso.
Ti petision ket addaan ti saludsod maipapan kadagiti limitasion ti procedural immunity ti maysa a sitting impeachable officer tapno lawlawagan ti korte.
