LAOAG CITY – Naiget a naglikudan ni Vice President Sara Duterte dagiti maibatbato nga alegasion mainaig iti maipagarup a binilyon a pisos a bank accounts kagiddan iti panangsungbatna iti agdama nga administrasion a pilit nga us-usarenna ti makinaria ti gobierno tapno mangperdi ken umadayo ti atension ti publiko.
Iti maysa a pormal a rakurak, inpaganetget ti Bise Presidente a nadalus ti service record-na ken awan ti pakainaiganna iti korapsion usar ti pundo ti gobierno.
Kunana a ti kada sentimo ti kuartana ken dagiti sanikua ket naggapu iti lehitimo a wagas ken umno a panangideklarar iti Statement of Assets, Liabilities, and Net Worth wenno SALN-na.
Inawagan ni Duterte a daan nga istoria ti akusasion a maysan a dekada nga ibatbato kenkuana ni dati a Senador Antonio Trillanes IV.
Nupay kasta, inpettengna a ti nagdumaan ita ket ti naiget a suporta ti nangangato nga opisial ti gobierno iti nasao a pammerperdi.
