LAOAG CITY – Kinumpirmaran ni Barangay Chairman Norberto Puyot iti Barangay Rayuray iti ciudad ti Batac a walo a pagtaengan ti mabanbantayan kalpasan a nagpositibo iti virus ni IN-C555, baket, agtawen ti 69, ken residente iti nasao a lugar.
Segun kenni Puyot, nakigtot isuna idi naamoan na a nagpositibo iti virus ti baket gapo ta addan ti tallo nga aldaw ti napalabas ket nakita na ti maseknan nga agputputed ti kayo.
Inbatad na a saan na nga ammo a naitaray iti ospital ken kalpasan daytoy ket nagpositibo iti covid-19.
Mainaig iti daytoy, kalpasan ti panagpositibo ti maseknan ket nagtataripnong da nga opisyales pakairaman dagiti tanod ken BHW.
Inlawlawag na a ditoy a naamoan na nga adda ti maysa a manugang ti baket nga agtabtrabaho iti delivery nga isu ti atapen da a nakaalaan ti virus ni IN-C555.
Naamoan da pay a kanayon nga agawid iti pagtaengan da ti manugang ti baket manipud iti trabaho na.
Agtultuloy met ti contact tracing ti City Heath Office iti nasao a ciudad kadagiti nakapulapol ni IN-C555.
Kabayatanna, manamnama met a dumalan iti swab test ti manugang ni IN-C555.
