LAOAG CITY – Natiliw ti maibilang a most wanted person iti ili ti Solsona.
Nabigbig daytoy a ni Polyn Reymundo y Pascual, agtawen ti 36, awanan ti asawa, maysa a drug surenderee, top 8 iti provincial level ken top 6 iti municipal level ken residente ti Brgy. Puttao iti nasao nga ili.
Ti warrant of arrest ket pinaruk-atan ni Judge Nida Alejandro iti RTC Branch 12 iti ciudad ti Laoag a napetsaan ti Mayo 4, 2017 gapo ti panaglabsing iti RA 9165 wenno ti Comprehensive Dangerous Drugs Act of 2002.
Nalabsing ti akusado ti Section 11 ken 12 ti RA 9165 ken nairekomendar ti 200 a ribo a pisos a pyansa ken ti maysa pay a kaso na ket nairekomendar ti pyansa nga 14 a ribo a pisos idinto ti linabsing na nga Sec. 5 ket awan ti nairekomendar a pyansa.
Gapo iti daytoy, mapilaan pay ti akusado ti kaso gapo ti panaglabsing na iti Comelec gun ban gapu ta natiliwan nga adda ikot na a maysa nga homemade caliber 22 nga addaan ti lima a bala ken innem a bala met para ti kalibre 45 a paltog.
Ti agdama ket maisagsaganan ti kaso a maipila kontra iti nasao a suspek.
