LAOAG CITY – Inlawlawag ti Department of Labor and Employment (DOLE) a saanen a mabalin nga ibabawi wenno ikissay dagiti employer ti ₱60 wage increase a naiteden kadagiti mangmangged idiay Metro Manila.
Daytoy ket iti baet ti panangiyisyu ti status quo ante order ti korte ti Pasig idi Hulio 25 a manglaplapped iti panangituloy ti implementasion ti wage hike.
Inpetteng ni Labor and Employment Secretary Francis Tolentino a nakasagana ken nakanayonen ti ₱60 ti sumagmamano nga employer para iti inaldaw a sueldo dagiti mangmangged sakbay pay a naiparuk-at ti pammilin ti korte.
Kabayatanna, kinumpirmaran met ni Tolentino a dua a korte ti nangiparuk-at ti pammilin mainaig iti temporario a panagpasardeng iti implementasion ti wage increase ngem saanda pay a naawat ti pammilin manipud iti maysa a korte.
Gapu iti daytoy, inpasigurado ti sekretario a sumurotda iti pammilin ti korte.
Mainaig iti daytoy, naiget nga inpaganetget ti Department of Labor and Employment a sumurotda iti pammilin ti korte ngem agtultuloy ti panangikalinteganda iti nagbalin a desision ken ilaban ti karebbengan dagiti mangmangged ken employer.
