LAOAG CITY – Natay ti 10 nga indibidual iti panagbettak dagiti fireworks iti maysa a religious festival idiay Mexico.
Malaksid kadagiti nairekord a natay, nasugatan pay iti insidente dagiti 64 nga indibidual kalpasan ti panagbettak kadagiti nakalemmeng a paputok nga asideg iti Santa María Canchesdá.
Sakbay iti insidente, nangiwayat ti selebrasion ti simbaan iti kapiestaan ti Our Lady of Light nga inatendaran dagiti sumagmamano a nakipagpaset.
Gapu iti napigsa a panagbettak ket nadadael ti paset ti simbaan no sadinno ket sumagmamano nga indibidual ti naipit iti uneg ti istruktura, pakairamanan dagiti dua a padi ken dagiti ubbing.
Kabayatanna, nangiwayat ti imbestigasion dagiti otoridad mainaig iti napasamak nga insidente.
