LAOAG CITY – Naakusaran ti maysa a Mayor idiay Mexico ti panagaramidna ti istoria a nakidnap daytoy tapno maliklikanna ti publiko gapu iti minilyon a gatad a kuarta a mapukpukaw manipud iti pondo ti lokal a gobiernoda.
Idi Mayo kadetoy a tawen, naipadamag a kinidnap dagiti tallo nga indibidual ti nasao a mayor a ni Nancy Napoles a kaduana ti kabsatna iti sanguanan ti pagtaenganda.
Mainaig iti daytoy, gapu iti nagbalin a testimonia dagiti nakakita, insigida a nabirukan dagiti otoridad ti mayor iti maysa a kalsada.
Kabayatanna, kalpasan ti tallo a bulan nga imbestigasion, napansin dagiti otoridad dagiti saan nga agsisilpo nga impormasion, no sadinno ket segun ken ni Napoles, nagkiddaw dagiti nang-kidnap kenkuana ti 40 million Mexican Pesos kas ransom money ken inbatadna a dinakamat dagiti kidnapers nga alaenna a pagbayadna ti ransom ti pondo ti munisipio.
