LAOAG CITY – Manamnama nga ipasardeng Parents-Teachers Association iti Bagbag Solsona National High School iti ili ti Solsona iti panagkolektar iti 100 a pisos iti tunggal nagganak a mausar iti pannakatarimaan ti galba a nadadael gapo iti naglabas a Supertyphoon Nando.
Daytoy ket kalpasan nga adda dagiti agrekreklamo iti panagkontribusyon gapo ta maipagarop a saan a naipakpakaamo kadagiti amin a nagannak ken dagiti laeng opisyales ti nagtataripnong.
Segun kenni Mrs. Janice Anayasan, ti PTA President, nagpaawag ti emergency meeting ni Mr. Gregorio Dumlao, ti School Head kadagiti PTA officials ken Classroom Presidente tapno ipakaammo dagiti nadadael gapo iti naglabas a bagyo.
Inbatad na nga adda tiresolusyon a boluntaryo ti panagbayad iti 100 pesos ti tunggal nagannak nga umabot kuma iti 50,000 pesos.
Kunana nga inkonsiderar da pay ti pannakausar ti MOOE ngem amangan no maibayag ti pannakatarimaan kadagiti nadadael gapo ta nabayag met ti pannakaiproseso ti pondo.
Mainaig iti daytoy, inlawlawag na nga idi pay laeng Oktubre 2 ti naikeddeng a deadline ngem saan pay a naiyawat iti PTA ti kwarta a nakolektar.
Innayon na a gapo kadagiti reklamo ket isubli da amin a nakolektar ken mangkita da ti sabali a wagas tapno masolusyonan ti nadadael a galba.
Kabayatanna, nagturong met ti grupo ti Bombo Radyo Laoag iti opisina ni Mr. Dumlao tapno alaen ti komento na iti daytoy ngem naamoan a naka-emergency leave daytoy.
