LAOAG CITY – Inbatad ni Barangay Chairman Jojo Bagay iti Barangay 5 iti ili ti San Nicolas nga adda ti 11 a balay a naapektaran ti bubon na gapu iti nag-leak a gasoline station iti nadakamat a barangay.
Inlawlawag na nga idi Nobyembre iti napalabas a tawen ket addan ti isyu seknan iti panag-leak ti nasao a gasoline station no sadinno a dua a balay ti maibagbaga a naapektaran, banag nga inaksyonan a dagus ti dati a kapitan babaen ti panangireport na iti Municipal Environment & Natural Resources (MENRO) ken ti Sanidad.
Kuna na nga iti panagtugaw na kas baro a kapitan iti nadakamat a barangay idi Disyembre 2023 ket nagsurat iti opisina ni Mayor Mike Hernando ken iti Municipal Environment & Natural Resources no sadinno nga inaksyunan da met nga insigida ti nasao nga isyu.
Inpalgak na nga idi damo ket bassit laeng ti apektado ngem bayat a bumaybayag ket umad-ado dan no sadinno nga iti agdama ket addan ti 11 a balay a naapektaran ti bubon na gapu iti panagleak ti nasao a gasoline station.
Inpakaammo na nga idi biernes ket nagsasango da iti opisina ni Mayor Hernando, kadwa da dagiti apektado a residente, kameng ti City Environment and Natural Resources Office ken ti akinbagi ti gasoline station.
Ditoy a napagtutulagan da a maikkan ti linya ti nawasa dagiti residente a naapektaran ti bubon na ken ibaklay amin ti akinbagi ti gasoline station ti magastos.
Mainaig iti daytoy, kuna ni Bagay nga amin dagiti 11 balay a napanan da ket makita a gasolinan ti karga dagiti bubon da ngem nangipatulod latta dagiti maseknan nga opisina ti sample testing iti Pampanga no sadinno nga inbaklay met ti lokal a gobierno iti ili ti San Nicolas ti nagastos para iti nasao nga addang.
Iti agdama, inbatad ni Barangay Chairman Bagay a ti nasao a gasoline station ket napaserraanen.
Mainaig iti daytoy, inpasigurado ni Mayor Mike Hernando a kalpasan a maurnus amin ti problema nga intunda ti nagleak a gasoline station iti bubon dagiti sumagmamano a balay iti nadakamat a barangay ken ma-comply amin ti nasao a negosyo dagiti kasapulan a requirements ket mapalubusan to metlaeng daytoy nga agoperar.
Kabayatanna, inpasigurado ti Bureau of Fire Protection a no manayunan ti danom ti karga ti bubon ket saan nga agsindi isut gapuna nga awan ti rumbeng a pagamkan dagiti residente iti possible a pannakaparnuay ti uram gapu iti daytoy a napasamak.
