LAOAG CITY – Inbatad ni Mr. Justin Paul Marbella, Information officer iti Dept. of Labor and Employment (DOLE) Region 1 a ti kangrunaan a makita kabayatan ti labor inspection ket ti General Labor Standard kas iti sweldo ken dagiti benipisyo kas iti 13th month pay; ken ti Occupational Safety ken Health.
Segun kenni Marbella, ditoy a kitaen dagiti labor inspectors wenno Labor Law Compliance Officers no sumursurot met laeng dagiti establishimento ti labor laws.
Inlawlawag na a ditoy Region 1, adda ti 12 a labor inspectors no sadinno ket dua iti kada field offices ken iti kada bulan ket adda ti aramiden dagiti maseknan a report seknan iti inspeksyon.
Naamoan a tinawen a maipatpatungpal daytoy ken kalikagom da a mabisita amin nga ili iti rehiyon.
Mainaig iti daytoy, kunana nga idi 2021 ket umabot iti 4677 a pasdek negosyo wenno 205% accomplishment rate ti nainspect manipud iti target a 2280 nga establishimento ditoy rehiyon Uno.
Mangnamnama met ni Marbella a sumursurot amin nga establishimento iti intero a rehiyon.
