LAOAG CITY – Manamnama a mangrugi ita a bulan ti Enero 2025 ti panagngato ti kontribusion dagiti miembro ken employer agingga iti 15% iti sidong ti Social Security System (SSS).
Ti panagngato ti contribution rate ket iti babaen ti Republic Act No. 11199, wenno Social Security Act of 2018.
Iti sidong ti linteg, maipatungpal ti 1% a panagngato ti kontribusion kadagiti miembro ti Social Security System iti tunggal dua a tawen, nangrugi manipud 12% idi 2019 agingga a dumanon iti 15 % ita a tawen 2025.
Mangrugi ita a bulan, ti bingay ti employer ket 10%, idinto a ti kontribusion ti empleado ket 5%.
Maipalagip nga idi 2022, kinuna ti Social Security System a ti nangatngato a kontribusion dagiti miembro ken employer ket nagresulta iti pannakapaatiddog ti fund life agingga inton 2054 ken manamnama nga agpaut daytoy agingga iti 2032, kalpasan ti P1,000 a panagngato ti pension benefits a naipatungpal idi 2017.
