LAOAG CITY – Inbatad ni Atty. Levi Baligod, pannakabagi dagiti 18 a nagpabigbig a dati a miembro ti Philippine Marines a mangisubmitirda ti baro nga affidavit iti Senate Blue Ribbon Committee.
Nagatendar ni Baligod iti nasao nga ahensia nga indauloan ti Cayetano bloc mainaig iti maanomalya a flood control projects.
Kinuna ni Baligod nga adda dagiti dati a miembro ti suldado a maipagarup pagpirpirmaen ti National Bureau of Investigation dagiti saan pay a nakasagana nga affidavit-da.
Kabayatanna, inpetteng met ni Senadora Imee Marcos nga agannad dagiti nasao a dati a suldado mainaig kadagiti maiparparuk-at nga alegasionda.
Manamnama ti agtultuloy a panagisubmitir ti dokumento ken posible a panangamendar kadagiti immunan a nairakurak kabayatan iti agtultuloy nga imbestigasion ti Cayetano ken Gatchalian bloc mainaig iti flood control scandal.
