LAOAG CITY – Inkalintegan manen ti dati a kongresista a ni Mike Defensor ti 18 a maipagarop a dati a soldado ken marino, ken naglikudan na pay dagiti alegasyon a naidiktar laeng ti ibagada iti naisayangkat a panagdengngeg iti Senate Blue Ribbon committee ti kampo ni Senador Alan Peter Cayetano, a mangipetpetteng nga isuna paylaeng ti Senate President.
Inpetteng ni Defensor nga indasar laeng dagiti 18 a dati a soldado ken marino ti personal a naimatangan da, ken sinungbatan da laeng ti saludsud a naibato kadakuada kabayatan ti panagdengngeg maipanggep iti isyu ti panagdeliber dagiti maleta a naglaon ti ado a kwarta iti sumagmamano nga agpanpanday linteg nga adda ti pakainaigan iti flood control issue.
Inpalgak pay ni Defensor nga adda dagiti nanggandat a manglapped kadagiti dati a soldado nga ipublikar dagiti ammo da.
Inbasura met ni Defensor dagiti akusasyon a binaliwan da ti palawag da, makibibiang da iti pulitika ken supsuportaran da ti pamilya Duterte.
Maipalagip nga iti testimonya, inakusaran dagiti dati a soldado ti sumagmamano a personalidad a nagawat ti komisyon wenno “kickback” manipod kadagiti proyekto a flood control, karaman ditoy da Senador Vicente Sotto III, Erwin Tulfo, ken dati a senador Antonio Trillanes IV.
Inraman da pay ti sumagmamano a miembro iti Kamara de Representantes, kas kada dati nga Speaker Martin Romualdez, ML Party-List Rep. Leila de Lima, ken ti dati a kongresista a ni France Castro.
Naglikudan met amin dagiti nadakamat nga agpanpanday linteg dagiti akusasyon kontra kadakuada.
