LAOAG CITY – Adda ti 19 a barangay manipud iti uppat nga ili idiay Sorsogon ti nakapasar ti ash fall kagiddan ti panagalburoto ti Bulkan Bulusan.
Basar iti kaudian a report ti Office of Civil Defense, karaman kadagiti naapektaran nga ili ti Bulan, Irosin, Juban ken Magallanes.
Gapu iti daytoy, naminsan manen a nagpalagip dagiti otoridad ti kinapateg ti panagan-annad kangrunaanna kadagiti addaan ti sakit iti pananganges ken ti panangsurot kadagiti pagalagadan tapno maliklikan ti dakes nga epekto iti pananglang-ab ti abo.
Immunan a nakairekord ti Office of Civil Defense ti 14,830 a pamilia wenno agarup 74,209 nga indibidual ti naapektaran ti panagsabog ti bulkan no sadinno a 19 a pamilia wenno katukad ti 61 nga indibidual ti nagtalinaed kadagiti evacuation center.
