LAOAG CITY – Nagkiddaw ti Office of the Ombudsman iti Senado nga isuko ti kopya ti CCTV footage mainaig iti insidente ti pammaltog a napasamak idi Mayo 13 iti uneg ti pasdek ti Senado.
Inbatad ni Ombudsman Jesus Crispin Remulla a paset daytoy ti nagsina nga imbestigasion ti opisinana tapno maammoan ti sibubukel a napasamak iti nasao nga insidente.
Kidkiddawen pay ti Ombudsman dagiti video footage a naala ti sumagmamano a media personnel kabayatan a mapaspasamak ti pammaltog.
Mangnamnama ni Remulla nga awan ti mapasamak a cover-up iti kaso.
Kagiddan daytoy, inanunsio ti innem a bulan a preventive suspension kontra ken ni Senate Acting Sergeant-at-Arms Mao Aplasca kabayatan nga agtultuloy ti imbestigasion.
Immunan nga inadmitir ni Aplasca a nagpaputok isuna ti warning shot kalpasan a maipagarup a nakumpirmaran ti presensia dagiti operatiba ti National Bureau of Investigation (NBI) iti GSIS wing ti Senado.
Nupay kasta, inlawlawag ni National Bureau of Investigation Director Melvin Matibag nga awan ti miembroda iti uneg ti Senado idi napasamak ti insidente.
Nadakamat a ni Aplasca ken Senador Ronald “Bato” dela Rosa ket agpada a miembro ti Philippine Military Academy (PMA) Sinagtala Class of 1986.
Naammoan a sakbay a nagbalin a Senate Sergeant-at-Arms ket nagserbi ni Aplasca kas retirado a Police Major General kalpasan a nainominar iti posision ni Bato idi 2025.
