LAOAG CITY – Umaboten iti 19 a tattao ti natay gapo kadagiti kalamidad kas iti Mirasol, Nando, Opong, ken ti Habagat.
Iti datos ti National Disaster Risk Reduction and Management Council, manipud iti bilang ket 15 ti maibal-validate pay laeng idinto nga uppat ti kumpirmado.
Malaksid kadagiti natay ket 18 a tattao ti nasugatan ken 14 ditoy ti kumpirmado.
Segun iti opisina, umabot iti 2,026,246 nga indibidual wenno 520,165 a pamilya ti apektado kadagiti 15 a rehiyon, 57 a probinsya, 504 a ciudad ken munisipalidad, ken 4,219 barangays.
Umabot met iti 351,840 ti naibakwit ken kaadoan kadagitoy ket adda ta iti 1,906 evacuation centers.
Inreport pay ti National Disaster Risk Reduction and Management Council a 407,914 a tattao wenno 114,121 a pamilya ti naibakwit iti Regions 1, 2, 3, 5, 6, Calabarzon, Mimaropa, CARAGA, Cordillera Administrative Region, ken Negros Island Region.
Kabayatanna, 243 a kalsada ken 46 a rangtay ti naapektaran ken 30 kadagiti kalsada iti Region 1 ket saan pay a madalanan.
Adda met ti 143 a ciudad ken ili ti napukawan ti kuryente no sadinno 105 kadagitoy ket naisubli metten ti serbisyo ti kuryent da.
Kabayatanna, iti benneg ti agrikultura, ti inisyal a perdisyon ket agbalor ti nasurok 914 milyon a pisos gapo iti 78,267.08 metric tons a production loss.
Iti imprastraktura ket nasurok 822 milyon a pisos manipud iti Region 1, Region 2, CAR, CALABARZON, MIMAROPA, Region 6, ken Region 7.
Adda metten ti 32 a ciudad ken ili ti nagdeklara ti state of calamity.
