LAOAG CITY – Naan-anayen nga inbasura ti House Committee on Justice ti dua a reklamo nga impeachment kontra ken ni Presidente Ferdinand Marcos Jr. kalpasan a pinatibker ti mayorya dagiti miyembro nakurang ti substansiya dagitoy.
Iti botos, 42 dagiti nangpabor, 3 ti nangkontra ken adda ti maysa a nag-abstain, naideklarar kas “insufficient in substance” ti reklamo nga inpila ni Atty. Andre de Jesus nga inyendorsar ni Rep. Jett Nisay.
Kabayatanna, iti sabali pay a botos, 39 ti nangkontra ken 7 ti pimmabor, naibasura met ti reklamo nga inpila ti Makabayan bloc a mangibagbaga nga adda ti “betrayal of public trust” ni Marcos mainaig iti maipagarop a saan a patas nga alokasyon ti pondo para kadagiti proyekto ti imprastruktura.
Maipalagip nga idi Pebrero 2, nabigbig nga agpada ti reklamo nga impeachment kontra iti presidente a “sufficient in form,” ngem iti naiget a panangtingiting ti komite, rimuar a saan nga umdas dagiti ebidensiya ken pagibasaran tapno ituloy dagitoy iti plenary.
Segun kadagiti miyembro ti komite, napateg a siguradwen a dagiti reklamo nga impeachment ket adda ti natibker a substansiya sakbay nga idasar iti nalawlawa a deliberasyon ti Kamara de representantes.
Ti desisyon ket mangipakpakita ti naiget a karit kadagiti mangilunglungalong ti impeachment kontra iti presidente, aglalo ket kontrolado dagiti kaalyado ti administrasyon iti pagpandayan linteg iti kongreso.
