LAOAG CITY – Umabot iti 21 a tattao ti natay idinto a naruay a sabsabali dagiti nasugatan kalpasan a nauram ti multi-storey building iti south Delhi, India.
Segun kadagiti otoridad, kaadoan kadagiti biktima ket gangannaet, pakairamanan dagiti aggapo kadagiti pagilian iti South Asia ken Africa, a nagturong iti India tapno agpaagas wenno adda ti kinuyog da a kabagyan da tapno mapaagasan iti nasao a pagilian.
Adda met ti nasurok nga 40 a pasyente a naisalakan ken naiyakar iti sabali nga ospital.
Saan pay a nalawag no mano amin dagiti tattao nga adda iti uneg ti ospital ken no ania ti nangrugyan ti uram.
Mainaig iti daytoy, inpasigurado ni Delhi minister Ashish Sood nga imbestigaren a naimbag dagiti otoridad ti napasamak tapno maamoan no ti pasdek ket addaan ti permit nga agoperar kas bed-and-breakfast facility, ken amin a maduktalan a responsable iti napasamak ket agsungbat.
Indanun met a dagus ni Indian Prime Minister Narendra Modi ti pannakipagladingit na ken inkari na ti pannakaipaay ti kompensasyon a 200,000 rupees wenno $2,088 para iti pamilya dagiti pimmusay idinto a 50,000 rupees para kadagiti nasugatan.
