LAOAG CITY – Umabot iti 230 nga hog raisers wenno agtaraken ti Baboy dituy probinsia a naapektaran ti African Swine Fever (ASF) ti nakaawat ti recovery aid manipod iti gobierno probinsial.
Daytoy ti kinumpirmaran ni Provincial Veterinarian Loida Valenzuela ken dagiti benepisiario ket pakairamanan dagiti saan a sakop ti insurance packages manipod iti Philippine Crop Insurance Corporation.
Inbatad na a dagiti kaudian a benipisario ket manipud iti ciudad ti Laoag ken Batac, ili ti Banna, Solsona, San Nicolas, Paoay, Marcos ken Vintar, nu sadino dagiti nadakamat a benipisario ket iso iti maikapat a batch a nakaawat ti recovery aid para kadagiti agtaraken ti baboy.
Nakaawat dagiti benipisario ti recovery cash aid nga agbalor ti 5,000 agingga 100,000 a pisos, depende ti kaado dagiti naapektaran a baboy nu sadinno dagiti dadduma ket nakaawat pay ti food packs ken vegetable seeds.
Malaksid iti hog repopulation program ti Department of Agriculture, nangiyalokar pay ti gobierno probinsial ti 5.3 million a pisos para iti recovery assistance.
Maipalagip a mapatta-patta a 2.5 million a pisos ti nausar para iti konstruksion dagiti permanent ken temporary shelters para iti animal evacuation, ken 2.5 million a pisos para iti livelihood assistance babaen ti panakaipaay ti taraken ken feeds, ken assistance ti animal shelters babaen ti panakaipaay ti feeds, ken agas.
Segun ken ni Valenzuela, iti agdama ket adda iti babaen ti “yellow zone,” nu sadinno pending pay laeng ti official declaration manipud iti Department of Agriculture a ti probinsia ket ASF-free.
Kabayatanna, pinapigsa ti gobierno probinsial ti ASF safeguards daytoy babaen ti pananglapped ti live hogs, pork meat ken dadduma pay a pork-based processed products nga awan ti proper documents na.
