LAOAG CITY – Umaboten iti 25 a muslim ti inarestar dagiti otoridad iti estado ti Kano iti northern Nigerian gapu iti pannangan ken panaginom da iti publiko iti panangrugin ti Ramadan.
Malaksid iti pannangan ken panaginom, ket adda pay dagiti naarestar gapu iti panaglako da ti nagduduma a taraon iti publiko idinto nga ag-fasting koma ti aramiden da kas paset ti panangrespetar iti Ramadan para kadagiti muslim.
Nagballaag ti deputy commander ti Hisbah a ni Mujahid Aminudeen nga itultuloy da ti operasyon da agingga nga agngudo ti bolan.
Inpetteng na pay a siasinno man a saan a mangrespeto ti Ramadan ket saan da nga i-tolerate.
Innayon na a dagiti naarestar a 25 a muslim ket napilaan dan ti kaso iti Sharia court ken dagitoy ket rumbeng laeng a madusa.
