LAOAG CITY – Adda ti sumagmamano a sachet a naglaon ti maipagarop a shabu ken 9 a bala ti kalibre 45 a paltog ti narekobre dagiti otoridad iti balay ti nakaikamangan ti maysa a pintor iti Barangay Raraburan ditoy ciudad ti Laoag.
Daytoy ket kalpasan ti insayangkat a search operation dagiti otoridad no sadinno a ti subject ket ni Mac-Mac Castro, maysa a pintor, maibilang kas Street Level Individual ken drug surrenderee.
Iti naiyuswat nga imbentaryo, karaman kadagiti nadumpiskar dagiti otoridad ket ti 16 a babassit a sachet a naglaon ti maipagarop a shabu ken ti 11 nga elongated sachet a naglaon met laeng ti maatap a shabu.
Malaksid kadagitoy ket adda pay ti tallo a nakalukat a transparent plastic sachet a nagyanan ti maipagarop a shabu residue ken maysa a naputol nga straw.
Ti subject ti operasyon ket awan iti balay ti nakaikamangan na idi nangiyuswat ti operasyon dagiti otoridad no sadinno nga agpapan maisursurat daytoy a damag ket saan pay a masinunuo ti lokasyon na.
Mainaig iti daytoy, adda ti alegasyon ti pamilya a sakbay ti operasyon ket maipagarop nga adda ti immuna a simrek iti balay da.
Agpapan ita ket awan pay ti sungbat wenno komento dagiti otoridad seknan iti alegasyon ti pamilya ti subject ti operasyon.
