LAOAG CITY – Umabot iti 27 a tattao ti natay iti nagsaruno a dua a mass shootings iti South Africa.
Basar iti report, immuna a rinaot dagiti armado a lallaki ti maysa a bar iti asideg ti Johannesburg a nakatayan ti 17 a tattao idinto a 15 a sabsabali ti nasugatan.
Kalpasan laeng ti agarop uppat nga oras ket napasamak met ti pammaltog iti ruwar ti entertainment venue iti asideg ti Cape Town a nakatayan ti 10 nga indibidual ken nakasugatan ti 11.
Ti South Africa ket isu ti kangatoan iti murder rates iti lubong ken marigatan a mangparmek kadagiti mapaspasamak a kinadamsak iti rehiyon.
Segun ken ni Gauteng Police Commissioner Lt Gen Tommy Mthombeni, karaman kadagiti naarestar kadagiti nakapasamakan ti pammaltog ket manipod iti Ethiopia ken Lesotho.
