LAOAG CITY – Inpakaammo ni Engr. Romeo Bartolome ti Department of Public Works and Highways – 1st District Engineering Office a dumanon iti tallo agingga lima a milyon a pisos ti balor iti pannakadadael ti slope protection ti maysa a kalsada iti Brgy. Vira ditoy siudad ti Laoag.
Segun kenkuana, daytoy ket maysa kadagiti farm to market road projects-da a nadadael gapu iti iduduprak ti Super Typhoon Carina ditoy probinsia iti kallabes.
Inbatadna a napagbalin a road widening project ti nasao a proyekto gapu ta saan a kabaelan a makapagsinnabat dagiti dadakkel a lugan.
Inlawlawagna a ti calamity fund ti pagkautanda iti pundo para iti pannakatarimaan iti nasao a kalsada.
Inpasingkedna nga adda ti pammilinna iti contractor a mapanda kitaen ken tarimaanen ti kalsada tapno saan a maapektaran dagiti motorista a dumalyasat iti lugar.
