LAOAG CITY – Mangiyuswat ti transport group a Manibela ti tallo nga aldaw a nationwide transport strike mangrugi intono Miyerkules, Setyembre 17 agingga iti Biyernes, Setyembre 19 kas panangipakita ti panangkontra da iti kurapsyon iti flood control projects.
Iti rakurak ti grupo, nadismaya da no kasano a ti excise tax manipud it diesel a baybayadan dagiti jeepney driver ket maus-usar tapno mapondoan ti nagarbo a panagbiag dagiti sumagmamano nga opisyal a karaman iti kontrobersya, kasta metten dagiti annak da.
Inpetteng dagitoy a saan a rumbeng nga isuda ti mangibaklay iti luho dagiti kurakot nga opisyal idinto a dagiti driver iti jeep ket agtrabtrabaho tapno laeng mabiag ti pamilya da.
Daytoy met ti kangrunaan a rason no apay a mangiyuswat da ti transport strike.
Kabayatanna, ummuna metten nga inrakurak ti maysa pay a transport group a PISTON a mangiyuswat da met ti nationwide transport strike kontra iti kurapsyon intono Huwebes, Setyembre 18.
