LAOAG CITY – Nakipaset ti 31 a mannalon manipud iti nagduduma a Rice Cluster ditoy siudad ti Laoag iti panagsanay iti Cluster Development Plan for Rice Clusters.
Daytoy ti inpakaammo ni Engr. Shiela Opelac, mangidadaulo ti City Agriculture Office ditoy siudad ti Laoag.
Segun kenkuana, dimmalan dagiti mannalon iti lima nga aldaw a panagsanay iti nasao a programa.
Inbatadna a ditoy a naipaadal iti pannakabukel wenno aramid ti Cluster Development Plan a maysa a napateg nga addang para iti nangatngato a produksion ti bagas ken ad-adda nga organisado ken market-oriented nga industria ti bagas iti probinsia.
Naammoan a ti nadakamat a panagsanay ket panangsuporta iti programa ti Agriculture and Fisheries Extension System (PAFES).
