LAOAG CITY – Inpasingked ni Atty. Roxanne Castro, ti City Administrator ditoy ciudad ti Laoag a masurot dagiti probinsyon a naipalaon iti Executive Order (EO) ni Presidente Rodrigo Duterte.
Daytoy ket mainaig iti pannakausar dagiti shuttle a pagluganan dagiti tattao no adda ti emergency, mapan gumatang ti agas wenno makitienda iti sentro ditoy ciudad ti Laoag.
Immunan nga inbatad ni Mayor Michael Marcos-Keon nga adda ti 36 a shuttle a maikabil iti nagduduma a barangay ditoy ciudad tapno adda ti pagluganan dagiti residente a mapan aggatang iti kasapulan da iti uneg ti pagtaengan.
Inkalintegan met ni Castro a ti panangikabil da ti shuttle iti nagduduma a barangay ditoy ciudad ket saan a panggutigot kadagiti residente tapno agkararuwar da iti pagtaengan no di ket kayat da laeng a matulungan dagiti awan ti pagluganan na a mapan iti sentro tapno gumatang iti makan ken agas, kasta met no adda emergency.
Inpasigurado met ni Castro a masurot ti social distancing iti uneg ti shuttle isut gapu na nga umabot laeng ti pito a tattao ti mailugan.
Maipalagip a naipasardeng amin ti panagpasada ti aniaman ti klase na a behikulo kalpasan iti pannakaipatungpal ti Enhanced Community Quarantine iti intero a Luzon gapu iti Coronavirus.
