LAOAG CITY – Maysa a research laboratory idiay South Carolina, U.S.A. ti nalibasan ti 43 a sunggo nga us-usarenda para iti panagadal iti brain disease.
Agtultuloy ti panangbirok dagiti otoridad kalpasan a nakaruk-at dagiti 43 a Rhesus macaque manipud iti Alpha Genesis research laboratory.
Ti laboratorio ket maysa a medical research facility iti Yemasee, Beaufort County a mangisaysayangkat ti panagsukisok maipanggep iti brain disease disorder treatments babaen kadagiti sunggo.
Basar iti statement ti Alpha Genesis, nakaruk-at dagiti sunggo gapu iti panagbiddot ti maysa kadagiti agtartaraken no sadinno a saanna a nai-lock a naimbag ti kulungan.
Agdama a padpadasen dagiti otoridad ken ti kompania nga isubli dagiti sunggo babaen iti taraon ken thermal imaging cameras.
Naabisoan dagiti residente ti Yemasee a pagtalinaeden a nakarikep dagiti pagtaenganda.
Ti Alpha Genesis ket addaan ti history kadagiti problema iti kulungan a nagbalin a rason dagiti sumagmamano nga insidente ti nakaruk-at a sunggo idi 2014.
