LAOAG CITY – Kinumpirmaran ni Atty. Krissy Conti, assistant to counsel iti International Criminal Court (ICC), a nabukelen ti Trial Chamber III a mangiggem iti kaso ni dati a Presidente Rodrigo Duterte mainaig iti war on drugs.
Segun ken ni Conti, nangdutuk ti International Criminal Court ti tallo nga huwes a dagitoy ket isuda Judge Joanna Korner, Judge Keebong Paek, ken Judge Nicolas Guillou, tapno denggen dagiti nasao a kaso.
Inpakaammo na a dagiti sumaruno nga addang ket agpapada nga administratibo ken agkasapulan ti koordinasyon iti nagbaetan ti prosecution, defence, ken victims’ legal teams.
Possible a maiyuswat ti status hearing iti private session kadagiti sumarsaruno nga aldaw.
Ti International Criminal Court ket rinugyan na ti imbestigasyon iti Pilipinas kalpasan dagiti report a rinibo dagiti pimmusay iti babaen ti kampanya kontra illegal a droga ni Duterte manipod 2016 agingga iti 2022.
Idi 2021, pinalubusan ti ICC Pre-Trial Chamber ti full investigation, nga iti saan a nagbayag ket temporaryo nasuspenso ngem naituloy manen idi 2022.
Iti baet ti panagikkat ti Pilipinas manipod iti Rome Statute idi 2019, inpetteng ti International Criminal Court nga adda ti hurisdiksiyon na kadagiti krimen a maipagarop a napasamak kabayatan a miembro paylaeng ti pagilian.
Ti panangbukel ti Trial Chamber ket napateg a lebel iti proseso gapu ta daytoy ti mangilukat ti pormal a panangusig no sadinno a matratar dagiti ebidensya ken testimonya kontra iti dati a presidente.
Iti agdama, namnamaen ti naig-iget a koordinasyon kadagiti partido tapno masigurado a naurnus ti taray ti proceedings.
