LAOAG CITY – Natay ti lima nga indibidual kalpasan a naidungpar ti maysa a liquefied petroleum gas (LPG) tanker iti konkreto a paset ti Kokhraj Toll Plaza iti distrito ti Kaushambi, Uttar Pradesh, India.
Basar iti ala ti Close Circuit Television camera, napukawan ti kontrol ti tanker sakbay a naidungpar iti toll plaza a nangitunda ti nalawa a panagtedted ti LPG.
Naammoan a kalpasan ti agarup dua a minuto, nagliyab ti agtedtedted a gas ken nangitunda ti napigsa a panagbettak ken nauram iti dakkel a paset ti toll plaza.
Karaman kadagiti pimmusay ti driver ti tanker ken uppat nga empleado ti toll plaza.
Umabot iti lima ti bilang dagiti natay kalpasan a pimmusay iti ospital ti maysa kadagiti nasugatan a biktima kabayatan a maag-agasan.
Mainaig iti daytoy, sumagmamano pay nga indibidual ti nagsagaba ti nakana a pannakasinit ken nauram ti 16 a motorsiklo ken dua a lugan a nakaparada nga asideg iti toll plaza.
Agtultuloy nga im-imbestigaran dagiti otoridad ti namunganayan ti aksidente.
