LAOAG CITY – Makaawat ti sag-200 a ribo a pisos dagiti 559 a Barangay ditoy probinsia manipud iti gobierno national babaen ti inisiatibo ni Presidente Ferdinand Marcos Jr.
Segun ken ni Ryan John Pascua, Liga ng mga Barangay President IIocos Norte chapter a nangipilada idi iti Sangguniang Panlungsod ti resolusion a mangted ti bileg ken ni Governor Cecilia Araneta Marcos a mangawat ti nasao a pondo.
Inlawlawagna a daytoy a pondo ket magudua iti dua no sadinno ket ti 100 a ribo a pisos ket maipaay kadagiti 5 nga scholars a mapili iti maysa a Barangay.
Kinunana a dagitoy nga scholars ket dagiti ag-4th year college para ti school year 2026-2027 a dagitoy ket masapol nga awan pulos ti awawatenda nga scholarship program manipud kadagiti sabali pay a programa a mangipapaay ti tulong pinansial kadagiti estudiante.
Innayonna, a ti nabati a 100 a ribo a pisos ket maipan iti priority project a kalikagum ti maysa a barangay kas koma ti pannakagatang kadagiti tugaw, laptop, printer, projector, tent ken tallo a generator.
Mainaig iti daytoy, inbatad ni Pascua a ti kangrunaan a kalikagum dagiti barangay ket ti 100 a tugaw ken 2 a tent.
