LAOAG CITY – Natay ti innem nga indibidual a pakairamanan ti suspek iti multiple stabbling incident iti shopping centre idiay Sydney, Australia.
Kinumpirmaran ti local police a maysa a lalaki a maipagarop nga attacker iti insidente ti napaltugan ken iti saan a nagbayag ket pimmusay idinto a maysa nga ubing ti karaman kadagiti nasugatan iti insidente.
Naamoan nga agmaymaysa ti suspek a nagaramid iti krimen ken awan ti makita a pangta iti publiko kalpasan ti insidente.
Immuna iti daytoy, dagus a rinespondean dagiti ambulansiya dagiti tattao iti nakapasamakan ti krimen iti Bondi Junction area no sadinno a naireport nga adda ti maysa a lalaki a magmagna iti Westfield shopping centre nga adda ti iggem na nga immuko.
Kabayatanna, dagus a nakisimpatya ni Australian Prime Minister Anthony Albanese kadagiti nasugatan iti insidente ken nagyaman kadagiti dagus a nagresponde.
Inbilin met dagiti otoridad kadagiti tattao a liklikan da paylaeng ti agturong iti lugar bayat a ginasut nga indibidual ti naibakwit manipod iti shopping centre.
Rumrumuar a ti nakapasamakan ti krimen ket lugar a pagnanaedan ti Jewish community isut gapuna a saan a maliklikan a maikonektar ti nasao nga insidente iti Israel-Hamas war.
Agtultuloy ti imbestigasyon dagiti otoridad tapno maamoan ti pudno a motibo ti suspek iti krimen.
