LAOAG CITY – Kinumpirmaran ti Lebanese Health Ministry nga umaboten iti 60 a tattao ti natay iti inpatungpal nga airstrikes ti Israel iti eastern Bekaa valley idiay Lebanon.
Basar kadagiti opisyal, karaman ti dua nga ubbing a pimmusay iti strikes a timmama iti 16 a lugar iti Baalbek region.
Segun iti Ministry, malaksid kadagiti natay ket adda pay ti 58 nga indibidwal a nasugatan, no sadinno nga agtultuloy ti aiyus-uswat a rescue efforts iti valley a kuta ti militante nga Hezbollah.
Iti agdama ket saan pay a nangiparuk-at ti komento ti Israel military mainaig iti nasao a panagatake.
Kabayatanna, inawagan ni Baalbek governor Bachie Khodr dagiti nasao a panagatake kas pinaka-bayolente sipud iti napalabas a bolan iti conflict iti nagbaetan ti Israel ken Hezbollah.
Maipalagip a rinibo nga air strikes ti inpatungpal ti Israel iti Lebanon kadagiti napalabas a lima a lawas a pinuntirya na dagiti operatiba, imprastruktura ken dagiti armas ti Hezbollah.
